Ishyirahamwe ry’Umupira w’Amaguru ku Isi, FIFA, ryafatiye ibihano amakipe 150 arimo Rayon Sports kubera abari abakozi ba yo bayareze bayashinja kudashyira mu bikorwa amasezerano impande zombi zari zaragiranye.
Kuri uyu wa Kabiri, tariki ya 11 Ugushyingo 2025, ni bwo hamenyekanye amakipe 150 yafatiwe ibihano na FIFA kubera amakosa yakoze yo kwirukana abari abakozi ba yo mu buryo bunyuranyije n’amategeko. Aya makipe yabujijwe kwandikisha abakinnyi kugeza igihe azabanza gukemurira ibibazo afitanye n’abayareze.
Ikipe yo mu Nzove iherutse kuregwa na Robertinho wari umutoza wa yo, na yo yabujijwe kwandikisha abakinnyi kugeza igihe izakemurira ikibazo ifitanye n’uyu mutoza wirukanwe mu buryo bunyuranyije n’amategeko.
Andi makipe yo ku Mugabane wa Afurika yafatiwe ibihano byo kutandikisha abakinnyi, arimo Nyasa ig Bullets yo muri Malawi, KenGold SC yo muri Tanzania, Township Rollers yo muri Botswana, AS Arta Solar7 yo muri Somalia, Coto Sport de Garoua yo muri Cameroun, TS Galax na Pretoria Callies zo muri Afurika y’Epfo.
Hari kandi, Welkite Kenema FC yo muri Éthiopie, SCCM yo muri Maroc, Ismaily SC na Zamalek zo mu Misiri, Enyimba FC yo muri Nigeria na Club Sportif Sfaxien yo muri Tunisie.
Robertinho ari mu batumye Rayon Sports ifatirwa ibihano na FIFA byo kutandikisha abakinnyi
