Ihuriro AFC/M23 ryatangaje ko ryohereje abarwanyi kabuhariwe hafi y’Ikibuga Mpuzamahanga cy’Indege cya Bangoka, i Kisangani muri Repubulika Iharanira Demokarasi ya Congo kugira ngo bahagabe ibitero bya drones.
AFC/M23 yemeje ko ari yo yagabye igitero cya drones kuri iki kibuga cy’indege tariki ya 1 Gashyantare n’iya 1 Werurwe 2026, igamije gusenya igice cyaho gikoreshwa n’abasirikare ba RDC n’abafatanyabikorwa babo.
Iri huriro ryasobanuye ko Ingabo za RDC n’abafatanyabikorwa bazo bifashisha iki kibuga cy’indege mu gutegura ibitero bya drones no kubigaba ku birindiro byaryo no ku basivili mu Ntara ya Kivu y’Amajyaruguru na Kivu y’Amajyepfo.
Umuvugizi Wungirije wa AFC/M23, Dr. Oscar Balinda, yatangaje ko iri huriro rifite amatsinda y’abakomando ajya hafi ya Kisangani, akagaba ibitero bigamije kuburizamo umugambi wo guhungabanya ibice rigenzura.
Dr. Balinda yagize ati "Ingabo z’abakomando zigenda amanywa n’ijoro, zijya gukora akazi zarangiza zikagaruka. Rero baragiye barakora, barangije baragaruka. Iryo terabwoba ni ryo dushaka guhagarika kugira ngo twubahirize agahenge, dusubire ku meza y’ibiganiro, tugere ku mahoro arambye."
Ku wa 2 Werurwe 2026, AFC/M23 yungutse abarwanyi bashya 1518 batorejwe mu kigo cya gisirikare cya Rumangabo muri Teritwari ya Rutshuru. Iri huriro risobanura ko ari abakomando bafite ubumenyi bwihariye bwo kurwana bari mu rugendo, aho gushinga ibirindiro bihoraho.
Umuyobozi w’Ibiro by’Umuyobozi Mukuru wa AFC/M23, Yannick Tshisola, yaciye amarenga ko aba barwanyi bazajya bakora nk’abaheruka kugaba igitero ku kibuga cy’indege cya Bangoka.
Dr. Balinda yasobanuye ko abarwanyi ba AFC/M23 bajya gutera Kisangani, barangiza bagasubira iyo bavuye
