Imirwano yabaye hagati ya Cruzeiro Esporte Clube na Atlético Mineiro mu mukino wa nyuma w’irushanwa rya Campeonato Mineiro muri Brésil, yatumye hatangwa amakarita 23 y’umutuku mu mukino umwe.
Mu rukerera rwo kuri uyu wa Mbere, tariki ya 9 Werurwe 2026, ni bwo habaye umukino wa nyuma wa Campeonato Mineiro, irushanwa rihuza amakipe yo mu gace ka Mineiro muri Brésil.
Umukino ugeze ku munota wa 60, Cruzeiro yabonye igitego ari na cyo rukumbi cyabonetse mu mukino wose, gusa Atlético Mineiro yakomeje gusatira ishaka kwishyura ariko biranga.
Ku munota wa gatandatu w’inyongera, umunyezamu wa Atlético Mineiro, Everson, yafashe umupira, ariko agaragaza imyitwarire idasanzwe asanga umukinnyi wa Cruzeiro, Christian, amukinira nabi hahita hatangira imirwano.
Nyuma y’iminota 10 hari imvururu mu mukino zari zinjiwemo n’abakinnyi bose, umusifuzi w’umukino, Matheus Delgado, yahise yerekana amakarita atukura ku bakinnyi 23.
Abo barimo 12 bakinira Cruzeiro yegukanye Igikome. Abo ni Christian, Gerson, Fagner, Walace, Matheus Henrique, Cassio, Villalba, Kaua Prates, Joao Marcelo, Kaio Jorge, Romero na Fabricio Bruno.
Ku ruhande rwa Atlético Mineiro abakinnyi 11 ni bo beretswe amakarita. Abo ni Everson, Cassierra, Preciado, Minda, Ruan Tressoldi, Lyanco, Hulk, Franco, Alonso, Gabriel Delfim na Lodi.
Aka ni agahigo mu mateka y’umupira w’amaguru muri Brésil, kuko ari bwo bwa mbere hatanzwe amakarita atukura menshi angana atyo mu mukino umwe.
Gusa Argentine iracyari ku mwanya wa mbere mu kugira umukino watanzwemo amakarita menshi.
Aho ni mu 2011, ubwo Claypole na Victoriano Arenas zo mu Cyiciro cya Gatanu, zahuraga hakavamo imirwano yatumye umusifuzi, Damián Rubino, atanga amakarita 36, harimo 22 yahawe abakinnyi bari mu kibuga ku makipe yombi, andi 14 ahabwa abasimbura n’abatoza.
CENAS LAMENTÁVEIS! Porradaria generalizada na reta final de Cruzeiro x Atlético-MG na final do Campeonato Mineiro.#futebol #atléticomg #cruzeiro #ge pic.twitter.com/GksY7u4o7s
— ge (@geglobo) March 8, 2026
Umukino wa nyuma w'irushanwa rya Campeonato Mineiro wari ishiraniro
Umukino wa Cruzeiro Esporte Clube na Atlético Mineiro wasojwe n'imvururu usiga abakinnyi 23 bahawe amakarita atukura
Cruzeiro Esporte Clube yegukanye Igikombe cya Campeonato Mineiro
.jpg)
