Ku wa 25 Gashyantare 2026, Leta y’u Rwanda yakiriye impunzi n’abimukira 164 bari baraheze muri Libya, bose bakomoka mu bihugu byo muri Afurika.
Aba barimo 143 bakomoka muri Sudani imaze imyaka hafi itatu yugarijwe n’intambara, 19 bakomoka muri Eritrea, umwe ukomoka muri Ethiopia n’umwe wo muri Sudani y’Epfo.
Gahunda yo kwakira impunzi n’abimukira baturuka muri Libya ishingiye ku masezerano u Rwanda rwagiranye n’ishami ry’Umuryango w’Abibumbye rishinzwe impunzi (HCR) n’umuryango wa Afurika Yunze Ubumwe (AU).
Iyi gahunda izwi nka ETM (Emergency Transit Mechanism) igamije gushakira impunzi n’abimukira baheze muri Libya aho kuba by’agateganyo mu gihe bashakirwa ibihugu bazabamo burundu.
Impunzi n’abimukira baturuka muri Libya bacumbikirwa mu nkambi y’agateganyo ya Gashora mu Karere ka Bugesera. Aho ni ho batangira ibyangombwa, bigasuzumwa mbere yo koherezwa mu bindi bihugu byemeye kubakira ngo babituremo.
Kuva ETM yatangira gushyirwa mu bikorwa mu 2019, u Rwanda rumaze kwakira impunzi n’abimukira 2760 baturutse muri Libya, barimo abarenga 2500 bamaze kubona ibindi bihugu bibakira.
Izi mpunzi n'abimukira bageze mu Rwanda mu masaha y'ijoro
Ku kibuga cy'indege cya Kigali, imizigo yabo yabanje gusakwa
Impunzi n'abimukira baturutse muri Libya biganjemo abakomoka muri Sudani
Bakomereje mu nkambi y'agateganyo ya Gashora i Bugesera
