Umutoza wa Manchester City yo mu Bwongereza, Pep Guardiola, yatangaje ko yatunguwe n’icyemezo cy’impuzamashyirahamwe y’umupira w’amaguru muri Afurika (CAF) cyo kwambura ikipe ya Sénégal igikombe cya Afurika (CAN).
Mu kiganiro Guardiola yagiranye n’abanyamakuru kuri uyu wa 20 Werurwe 2026, yasabwe kugira icyo avuga kuri iki cyemezo, asubiza ko atazi impamvu ikipe ya Sénégal yambuwe CAN kubera ko kitafatiwe mu ruhame.
Guardiola yagize ati “Biratangaje. Nta gitekerezo kiboneye mbifiteho kubera ko sinzi impamvu yabyo. Sinabisomye, sinabibonye ariko ni icyemezo cyafatiwe mu gikari.”
Tariki ya 18 Mutarama 2026, ikipe ya Sénégal yegukanye CAN itsinze Maroc igitego kimwe ku busa. Uyu mukino waranzwe n’imvururu zikomeye ubwo waganaga ku musozo zatewe na penaliti yahawe Maroc, abandi ntibabyumve.
Abakinnyi ba Sénégal n’umutoza Pape Thiaw barigumuye bava mu kibuga ariko nyuma y’iminota bingingwa na Sadio Mané bemeye gusubira mu kibuga, Maroc ihabwa penaliti ariko umukinnyi wayo, Brahim Díaz, arayihusha.
Iminota 90 y’umukino yarangiye amakipe anganya ubusa ku busa, umusifuzi yemeza ko agomba gukina iminota 30 y’inyongera. Igitego cyatsinzwe na Pape Gueye ku munota wa 94 cyahesheje Sénégal intsinzi, yegukana CAN.
Komisiyo ishinzwe imyitwarire muri CAF yafatiye ibihano amashyirahamwe y’umupira w’amaguru mu bihugu byombi birimo gutanga amande, bamwe mu bakinnyi n’umutoza Pape Thiaw bahagarikwa by’agateganyo.
Ishyirahamwe ry’umupira w’amaguru muri Maroc ryajuririye ibi bihano, rigaragaza ko ikipe ya Sénégal ari yo yagombaga guhanwa bikomeye kubera ko yarenze ku mategeko agenga amaruhanwa ategurwa na CAF, ikanga gukomeza umukino.
Tariki ya 17 Werurwe, Akanama ka CAF gashinzwe ubujurire katangaje ko ikipe ya Sénégal yarenze ku mategeko ubwo yangaga gukomeza umukino, kanzura ko itewe mpaga, yamburwa na CAN, ihabwa Maroc.
Ishyirahamwe ry’umupira w’amaguru muri Sénégal ryateye utwatsi icyemezo cya CAF, riteguza ko rizajurira mu rukiko rwa siporo ku Isi (TAS). Guverinoma y’iki gihugu yagaragaje ko mu gufata iki cyemezo habayemo kugoreka amategeko no gutesha agaciro uyu mukino.
Guverinoma ya Sénégal, ibinyujije mu itangazo ryanyuze ku biro bya Perezida w’iki gihugu, ryasabye ko hakorwa iperereza mu kanama k’ubujurire ka CAF kugira ngo harebwe niba nta ruswa yatanzwe kugira ngo iki cyemezo gifatwe.
Sénégal yambuwe igikombe cya CAN ikimaranye amezi abiri
Pep Guardiola yatangaje ko icyemezo cyo kwambura Sénégal igikombe cy'irushanwa rya CAN cyamutunguye
.jpg)
